لما أبوك يجى

موضوع: لما أبوك يجى الخميس مارس 25, 2010 10:08 am

معانا قصة قصيرة خااالص ..

تعالو نشوف قصتنا بتحكى عن ايه ..

سمير فى سن 4 سنين ..

بيلعب مع العيال فى الشارع فجأة ولد اقترح .. ما تيجو نأجر عجل .. واتفقوا كلهم إلا سمير لازم ياخد الاذن الاول من ماما .. وإلا هو عارف

- ماما ماما .. عايز أأجر عجل مع صحابى ..

-- تتعور يا حبيبى ..

- ما كلهم راكبين اشمعنى انا ..

-- هما اشقيه يا حبيبى خليك انت شاطر وعاقل ..

- مليش دعوة عايز اركب عجلة ..

-- يووووه خلاص اركب لما ابوك يجى ..

سمير فى سن 8 سنين ..

راجعين من المدرسة .. اتفق مع زميله يذاكر عنده النهاردة وبالمرة يلعبوا بلاى ستيشن شوية .. اصل ماما محرمه عليه اللعب

- ماما ماما .. هروح اذاكر عند عمر ..

-- بيته بعيد يا حبيبى وبعدين هتيجى امتى ؟

- لسه الساعة سابعه وبعدين مش هتأخر ..

-- بس بيته بعيد برضة ..

- مش بعيد ولا حاجة كلهم 5 شوارع يعنى مش هخرج بره المنطقة

-- قولت لاء لاء .. لما ابوك يجي

سمير فى سن 12 سنة ..

حوش قرشين حلوين علشان يشترى هدية حلوة فى عيد الأم .. وبعد حيره اشترى برواز جميل يحمل اّيه الكرسى

- اتفضلى يا ماما كل سنة وانتى طيبة

-- وانت طيب يا حبيبى

-- جميلة اوى اوى ربى يخليك ليا

- طب اعلقها بقى ..

-- لاء انت هتعمل ايه

- هدق مسمار واعلقها فى الحيطة

-- تتعور يا حبيبى خليها لما ابوك يجي

- يا ماما ده مسمار .. متخافيش عليا

" طخ .. طخ .. طخ .... دششش .. " الشاكوش فلت نزلت على صباع سمير

-- هييييييييه " شهقة طويلة " مش قلتلك سيبها لما ابوك يجيى ..

سمير فى سن 17 سنة ..

نزل يتمشى شوية .. وقف امام محل ملابس .. لفت نظره طقم جميل اوى عجبه وقرر يشتريه ..

الفرصة مناسبة ... فالصيف داخل وهو لسه مجبش هدوم صيفى جديدة ..

- ماما ماما .. هاتى فلوس

-- كام يعنى .. افتح الشنطة خدلك خمسه جنية

- لاء خمسة ايه .. فيه طقم جميل اوى عجبنى عايز اشتريه .. مش غالى والمحل هنا على اول الناصيه

-- طب يعنى هتروح لوحدك ..

- اومال هاخد معايا زفه

-- استنا لما ابوك يجيى ..

- ابويا !! .. ليه ؟! انا اللى هشترى وانا اللى هلبس

-- ايوة يا حبيبى بس ابوك كبير وهيعرف يشترى معاك برضة .. هيضحكوا عليك

- يضحكوا عليا! ليه ؟ .. متقلقيش انا هعرف اتصرف بس هاتى فلوس

" وبعد ما اشترى الطقم ورجع "

- ها ايه رأيك يا ماما

-- جميل .. بس عمل كام

- 120 جنية

-- " تلطم وتصوت .. " كاااااام .. مش قولتلك استنى لما ابوك يجي

يتبع .. سمير لما اتجوز

كبر سمير وتجاوز سن العشرين ..

اعجب بـ زميلة العمل ساره وقرر ان يتقدم لها فى اليوم الموعود .. رايح بقى يفرح ماما

- ماما .. عندى ليكِ خبر هيفرحك يا ست الكل

-- دايما مفرحنى .. خير يا حبيبى

- الخميس اللى جاى هنرو ح لـ أهل سارة عشان اخطبها

-- يااااااه كبرت يا سمير وبتفكر فى بيت وجواز .. الف مبروك

-- طب وبابا يا حبيبى ..

- ماله بابا .. برضة هتقولي استنا لما ابوك يجي .. لو استنيته المرة دى يبقى مش هتجوز خالص .. بابا مات يا ماما من زمان وانتى عارفة كدا كويس .. انا اتربيت يتيم .. طول عمرك خايفة عليا .. كل ما اعمل حاجة او اطلب منك حاجة تقوليلى استنا لما ابوك يجى .. خايفة لاضيع منك فى غمضة عين زى بابا الله يرحمه .. انا كبرت وبقيت راجل يعتمد عليه وكمان قريب اوى هفتح بيت .. ارجوكِ يا امى اقبلى بالامر الواقع .. بابا مات .. وانا دلوقت راجلك وسندك .. الابن والاب وكل شىء .. كفايا يا امى

(( تمت ))

موضوع: رد: لما أبوك يجى الخميس مارس 25, 2010 3:05 pm

انا قولت كده برده ابوه
من اول القصه مش عايز يجى
وكل شويه لما ابوك يجى
لحد ما انا ابويا جه أقوم بقى
اشوفه عايز ايه

موضوع: رد: لما أبوك يجى الجمعة مارس 26, 2010 6:00 am

اسلوبك وطريقة عرضك للقصة فى منتهى البساطة

السهل الممتنع

تسلم ايديك يا شوشو بجد قصة جميلة وسلسة

بس على فكرة المدام عندى دايماً بتعمل كده

يا ترى انتى كمان بتعملى كده والا لاء

***************
الوتر الحزين

موضوع: رد: لما أبوك يجى السبت مارس 27, 2010 2:28 pm

صاحبة القصة ام مستفزة جدا
وانا عمرى طبعا ما هعمل كدة خالص
وشكرا لمروركم الجميييييييييييييييييييييييل

موضوع: رد: لما أبوك يجى الأحد مارس 28, 2010 12:13 am

شوشو ... شوشو ... موضوعك جميل جدددددددددددددددددا

ممكن تتقبلي مروري ... ولا

هتقوليلي استنا لما ابوك يجي

موضوع: رد: لما أبوك يجى الأحد مارس 28, 2010 9:56 am

انت بئا بذات استنى لما يجى اخوووووووووووووووووووووووووووووووك

وشكرا لمروركم جميعا

حكااة جامد اوى
حكااة جامد اوى